पुणे : दुसरे लेखक-प्रकाशक संमेलन चिपळूणमध्ये २८ आणि २९ डिसेंबर २०१९ रोजी होणार आहे. मेहता पब्लिशिंग हाउसचे प्रमुख अनिल मेहता यांची संमेलनाच्या अध्यक्षपदी निवड करण्यात आली आहे. अखिल भारतीय मराठी प्रकाशक संघाचे अध्यक्ष राजीव बर्वे यांनी पुण्यात पत्रकार परिषदेत ही माहिती दिली.
अखिल भारतीय मराठी प्रकाशक संघ, महाराष्ट्र साहित्य परिषदेची चिपळूण शाखा आणि चिपळूणमधील लोकमान्य टिळक स्मारक वाचन मंदिर यांच्या संयुक्त विद्यमाने हे संमेलन आयोजित करण्यात आले आहे. कोकणातील प्रसिद्ध लेखक कृषिभूषण डॉ. तानाजीराव चोरगे संमेलनाच्या स्वागताध्यक्षपदी असतील. तसेच, लोकमान्य टिळक स्मारक वाचन मंदिराचे विद्यमान अध्यक्ष आणि लेखक-कवी अरुण इंगवले संमेलनाचे कार्याध्यक्ष असतील.
ज्येष्ठ कादंबरीकार विश्वास पाटील यांची मुलाखत या संमेलनात होणार आहे. तसेच, प्रकाशकांच्या समस्या, ग्रंथविक्रीच्या नव्या वाटा-नव्या दिशा, प्रवास पुस्तकनिर्मितीचा, व्यवसायापलीकडचे लेखक-प्रकाशक स्नेहबंध या विषयांवर संमेलनात परिसंवाद होणार आहेत. महाराष्ट्र साहित्य परिषदेचे कार्याध्यक्ष प्रा. मिलिंद जोशीदेखील संमेलनाचा उपस्थित राहणार आहेत.
गेल्या वर्षी पहिले संमेलन भिलार या पुस्तकांच्या गावामध्ये भरले होते. यंदाच्या संमेलनाचा मान चिपळूणला मिळाला आहे. पहिल्या संमेलनाचे अध्यक्षपद लेखक डॉ. श्रीपाद जोशी यांनी भूषविले होते. एका वर्षी लेखक, तर एका वर्षी प्रकाशक या संमेलनांचे अध्यक्ष असतील. त्यामुळे यंदा या पदावर अनिल मेहता यांची निवड करण्यात आली आहे, असे राजीव बर्वे यांनी सांगितले.
(लोकमान्य टिळक स्मारक वाचन मंदिराच्या विशेष वस्तुसंग्रहालयाबद्दलचा लेख वाचण्यासाठी येथे क्लिक करा.)
